पुण्यात ५ जानेवारीला 'उडान नारीशक्ती रन': ११ हजार महिलांचा सहभाग अपेक्षित

पुण्यात ५ जानेवारीला 'उडान नारीशक्ती रन': ११ हजार महिलांचा सहभाग अपेक्षित

पुणे - ५ जानेवारी २०२५ रोजी बाणेर येथे महिलांच्या आरोग्य आणि सशक्तीकरणासाठी 'उडान नारीशक्ती रन' या प्रेरणादायी उपक्रमाचे आयोजन करण्यात आले आहे. ताम्हाणे चौक आणि स्वातंत्र्यवीर सावरकर उद्यान येथून सकाळी सहा वाजता या रनची सुरुवात होईल. यंदा या उपक्रमात ११ हजार महिलांचा सहभाग अपेक्षित आहे.

हा उपक्रम पूनम विशाल विधाते यांच्या वतीने आयोजित करण्यात आला असून, यंदा त्याचे दुसरे वर्ष आहे. “महिलांच्या आरोग्याची नववर्षात योग्य सुरुवात व्हावी आणि त्यांना समाजात पुढे जाण्यासाठी प्रेरणा मिळावी, हा आमचा उद्देश आहे,” असे विधाते म्हणाल्या.

कार्यक्रमाच्या उद्घाटनासाठी खासदार सुनेत्रा पवार आणि केंद्रीय राज्यमंत्री मुरलीधर मोहोळ उपस्थित राहणार आहेत. याशिवाय पारितोषिक वितरण समारंभासाठी महिला व बालकल्याणमंत्री अदिती तटकरे आणि उच्च तंत्रशिक्षणमंत्री चंद्रकांत पाटील उपस्थित असतील.

या उपक्रमात अभिनेत्री श्रुती मराठे, आमदार शंकर मांडेकर, आमदार सुनील शेळके, सिद्धार्थ शिरोळे, रूपाली चाकणकर, दीपक मानकर आणि प्रदीप देशमुख यांसारख्या मान्यवरांची उपस्थिती कार्यक्रमाचे मुख्य आकर्षण असेल.

'उडान नारीशक्ती रन' महिलांसाठी एक सकारात्मक चळवळ ठरेल, ज्यामुळे महिलांना आरोग्य व सशक्तीकरणासाठी एकत्र येण्याची संधी मिळेल. नववर्षाच्या आरोग्यदायी सुरुवातीसाठी हा उपक्रम पुणे शहरातील महिलांसाठी प्रेरणादायी ठरणार आहे.